Ermənistyanın baş naziri Nikol Paşinyan “Böyük Ermənistan” xülyası ilə yaşayan erməniləri xəyallara dalmağa deyil, reallığı dərk etməyə çağırıb.

Modern.az xəbər verir ki, Paşinyan mayın 22-də parlamentdəki “Hökumət saatı”nda çıxış edərkən “tarixi Ermənistan” ideyasının daşıyıcılarına səsələnərək deyib ki, real Ermənistan Respublikasının ərazisi 29 min 743 kvadrat kilometrdir.

Paşinyan müxalifətə işarə edərək, onlara xəyallarla yaşamamağı məslət görüb:

“Onlar istəyirlər ki, İrəvanın mərkəzindəki kafedə oturub, Qars barədə xülyalara dalsınlar və beləliklə də İrəvanın özünü də itirsinlər. Baxın, real və tarixi Ermənistan arasında olan fərq budur. Onlar istəyirlər ki, real Qafanda oturan adamlar Zəngilan və ya onların sözlərilə desək, “Sanasar” haqqında xəyallara qapılıb real Qafanı itirsinlər. Bu konseptual müzakirədir. Real Ermənistan gələcəkdir. Biz deyəndə ki, gələcək var, gələcək elə budur”.

Paşinyan deyib ki, real Ermənistan konkretdir.

“Biz real Ermənistanın sərhədlərini bilirik və səhərdən axşamadək kiməsə ağız açıb “təhlükəsizliyimizi qoruyun” deməkdənsə, ölkəmizin təhlükəsizliyini təmin edirik. Öz legitim mövqeyimizdə dururuq”.

Baş nazir Erməni Kilsəsini siyasətə qarışmaqda ittiham edib, onu Ermənistan dövlətini hədəfə çevirməkdən çəkinməyə çağırıb.