Aprelin 15-də “İnsan Alverinə Qarşı Mübarizə üzrə QHT Koalisiyası”nın 2024–2025-ci illəri əhatə edən dövri hesabat təqdimatı baş tutub. Təqdimat Koalisiyanın sədri, “Təmiz Dünya” Qadınlara Yardım İctimai Birliyinin rəhbəri Mehriban Zeynalova tərəfindən həyata keçirilib. O, çıxışında bildirib ki, bu, Koalisiyanın ilk dövri hesabat təqdimatıdır və gələcəkdə bu praktikanın mütəmadi şəkildə davam etdirilməsi nəzərdə tutulur. Hesabat 2024-cü ilin dekabr ayından 2025-ci ilin aprel ayınadək olan dövrü əhatə edir.
Bu müddət ərzində Koalisiyanın institusional inkişafı və strukturunun təkmilləşdirilməsi istiqamətində mühüm addımlar atılıb. Yeni sədrin seçilməsi ilə yanaşı, Koalisiyanın əsasnaməsi yenilənib, fəaliyyət planı təsdiqlənib, İdarə Heyəti və Nəzarət-Təftiş Komissiyası formalaşdırılıb. Bundan əlavə, arxiv və kitabxana yaradılıb, üzvlərə dair məlumat bazası hazırlanaraq istifadəyə verilib. Bütün bu tədbirlər Koalisiyanın idarəçiliyində şəffaflıq və sistemliliyin gücləndirilməsinə xidmət edir.
Hesabat dövründə qanunvericilik təşəbbüsü qrupu tərəfindən iki ay ərzində dörd görüş keçirilib. Görüşlərdə insan alveri qurbanlarının müəyyənləşdirilməsi, onların sosial reabilitasiyası və cəmiyyətə reinteqrasiyası ilə bağlı mövcud qərar və proqramların təkmilləşdirilməsi geniş şəkildə müzakirə olunub. Paralel olaraq, Koalisiyanın monitorinq qrupu sosial media platformalarında (TikTok, Instagram, Facebook) və müxtəlif tanışlıq saytlarında insan alveri elementləri daşıyan kontent və elanlar üzrə ətraflı təhlillər aparıb. Bu araşdırmalar nəticəsində risk daşıyan məzmunlar müəyyənləşdirilərək aidiyyəti qurumlarla paylaşılıb.
Maarifləndirmə və təlim sahəsində də Koalisiya fəal mövqe sərgiləyib. “Uşaq əməyinin istismarı və onun müəyyən edilməsi üzrə indikatorlar” mövzusunda təlimlər təşkil olunub. Təlimlərə sahə müvəkkilləri, uşaq inspektorları və yerli icma nümayəndələri cəlb edilib. Təlim modulunu təlimçi Günel Ələkbərova hazırlayıb və onun əsasında real halların müəyyənləşdirilməsinə yönəlik praktik məşğələlər keçirilib.
Əməkdaşlıqların genişləndirilməsi istiqamətində də mühüm təşəbbüslər həyata keçirilib. 17 yanvar 2025-ci il tarixində Koalisiyanın təşəbbüsü ilə insan alverinə qarşı mübarizə mövzusunda ictimai dinləmə təşkil edilib və tədbirdə 41 nəfər iştirak edib. Bundan əlavə, Sosial Tədqiqatlar Mərkəzi ilə qarşılıqlı əməkdaşlığa dair razılıq əldə olunub. Bu əməkdaşlıq çərçivəsində birgə tədqiqatların, sosial sorğuların və maarifləndirmə layihələrinin həyata keçirilməsi planlaşdırılır.
Media və ictimaiyyətlə əlaqələr sahəsində Koalisiya geniş fəaliyyət göstərib. Hesabat dövründə Koalisiyanın fəaliyyəti ilə bağlı 156 media xəbəri dərc olunub. Sosial şəbəkələr vasitəsilə ictimaiyyətlə əlaqə qurmaq, vətəndaş müraciətlərini cavablandırmaq və maarifləndirmə aparmaq məqsədilə xüsusi Instagram səhifəsi və yardım xətti fəaliyyət göstərir.
Mehriban Zeynalova təqdimat zamanı vurğulayıb ki, bu hesabat təqdimatları Koalisiyanın fəaliyyətində şəffaflığı artırmaq, üzvlər arasında qarşılıqlı əlaqələri gücləndirmək və insan alveri ilə mübarizə sahəsində daha geniş auditoriyaya təsir göstərmək məqsədi daşıyır. Eyni zamanda, bu təşəbbüslər ictimai nəzarətin gücləndirilməsinə və vətəndaş cəmiyyətinin möhkəmləndirilməsinə mühüm töhfə verir.