Moskvanın Taqanski Rayon Məhkəməsi məşhur sosial şəbəkə olan "Telegram Messenger Inc." şirkətini Rusiya Federasiyasında qadağan olunmuş məlumatı silməkdən imtina etdiyinə görə 3,5 milyon rubl məbləğində cərimələyib.

Yeniproqnoz.az xəbər verir ki, bu barədə TASS məhkəmə materiallarına istinadən məlumat yayıb.

"Moskvanın Taqanski Rayon Məhkəməsinin qərarı ilə "Telegram Messenger Inc." Rusiya Federasiyası İnzibati Xətalar Məcəlləsinin 13.41-ci maddəsinin 2-ci hissəsində nəzərdə tutulmuş inzibati xəta ilə bağlı təqsirli bilinib və 3,5 milyon rubl məbləğində inzibati cərimə tətbiq edilib", - məlumatda qeyd edilib.

Məhkəmənin mətbuat xidməti qərarın səbəbinin hansı qadağan olunmuş məlumata görə olduğunu açıqlamayıb.

Qeyd edək ki, bu, Telegram messencerinin oxşar səbəblərə görə məsuliyyətə cəlb edilməsi ilə bağlı ilk hadisə deyil. Bundan əvvəl, 2024-cü ilin avqust və oktyabr aylarında da Telegram hər dəfə analoji pozuntuya görə 4 milyon rubl cərimə edilmişdi. "Roskomnadzor" bu maddə ilə messencerə qarşı dəfələrlə inzibati işlərə başlayıb.(iqtisadiyyat.az)