Azərbaycan Prezidenti cənab İlham Əliyevin Kəlbəcərə səfəri təkcə Şərqi Zəngəzurun yenidən qurulması baxımından deyil, eyni zamanda 33 ildən sonra öz ata yurdlarına köçən sakinlərlə görüşdə səsləndirdiyi fikirlərlə beynəlxalq aləmə çox ciddi mesajlar vermiş oldu.

Bunu Yeniproqnoz.az -a açıqlamasında Milli Məclisin deputatı İlham Məmmədov deyib.

Deputat bildirib ki, Prezident İlham Əliyevin Kəlbəcərə, Ağdərəyə səfərini və oradan verdiyi mesajları belə oxumaq olar:

- Qarabağ və Şərqi Zəngəzur qlobal aləmdə baş verən iqtisadi, maliyyə böhranlarına baxmayaraq heç bir xarici dəstək olmadan Azərbaycanın öz daxili imkanları hesabına sürətlə yenidən bərpa olunur.

- Qarabağ və Şərqi Zəngəzur bərpa olunmaqla paralel olaraq, artıq Azərbaycan iqtisadiyyatının inkişafına, iqtisadi cəhətdən daha güclü dövlətə çevrilməsinə öz töhfəsini verməkdədir.

- Azərbaycan Cənubi Qafqazda sülhün memarı olaraq bölgənin artıq maraqlı güclərin qarşıdurma coğrafiyasından sülh, əməkdaşlıq məkanına çevrilməsidir. Cənab Prezidentin “Ermənistanla sülh müqaviləsinin müəllifi də bizik, o bəndlərin tərtibatında da bizim mövqeyimiz hər zaman əsas götürülmüşdür. Bu sənədin paraflanması faktiki olaraq Ermənistan-Azərbaycan qarşıdurmasına son qoyur” bəyanatı bunun sübutudur. Bu o deməkdir ki, bölgədə bundan sonra sülh, əməkdaşlıq hökm sürəcək. Sülh gündəliyinin memarı olan Azərbaycan yaxın gələcəkdə Cənubi Qafqazda bu hədəfinə də nail olacaq.

- Cənubi Qafqazda sülh Azərbaycanın maraqları və şərtləri əsasında bərqərar olacaq. Yekun sülhə mane olan əngəllər aradan qalxacaq. Xüsusən də ATƏT-in Minsk qrupu çox yaxın zamanda tamamilə ləğv olunacaq, Ermənistan konstitusiyasına dəyişikliklər ediləcək və Naxçıvanla birbaşa maneəsiz hərəkəti təmin olunacaq.

Bütün bunlar tarixi uğurlardır və biz qarşıda bu diplomatik sahədə həyata keçirilən uğurların hələ çox şahidi olacağıq”, – deyə deputat vurğulayıb.

Deputat onu da əlavə edib ki, Prezidentin verdiyi mesajlar sırasında bəzi ölkələrin bölgədə işğalın davam etməsi üçün Ermənistana təmənnasız olaraq milyardlarla dollar həcmində silah verməsi ilə bağlı məqam da olub:

“Prezident açıq şəkildə mesaj verdi ki, pulla silah almağa gücü çatmayan Ermənistanı silahlandırmağın bir məqsədi var idi: işğal siyasəti davam etsin, azərbaycanlılar öz doğma yurdlarına dönə bilməsin, bölgədə gərginlik hökm sürsün. Bu yolla onlar bölgədə maraqlarını təmin etsin. Amma cənab Prezidentin yürütdüyü məqsədyönlü və qətiyyətli siyasəti nəticəsində dünyanın ən mürəkkəb münaqişəsi olan Ermənistan-Azərbaycan münaqişəsi öz həllini tapdı və həmin ölkələrin uzun illər boyunca yürütdüyü bu çirkin siyasət iflasa uğradı. Cənab Prezidentin verdiyi mesaj ondan ibarət idi ki, həmin ölkələrin son vaxtlarda Azərbaycanı tutduğu yoldan döndərmək, sülhün, sabitliyin təmin olunmasına əngəl yaradan təzyiq və təhdid siyasətləri nəticə verməyəcək. Onlar niyyətlərinə nail ola bilməyəcəklər”.

Mürtəza