Amerikalı müğənni Britni Spirs emosional paylaşım edərək, övladlarından ayrı düşdüyü ən çətin illəri yada salıb.

O, "Instagram" hesabında yazıb ki, üç il ərzində oğlanları ilə zəng və mesajlaşmadan tamamilə məhrum olub. Bu dövrü yalnız inkar və göz yaşları ilə keçirdiyini bildirib. 

Müğənni həmçinin fitnes-məşqçi Sem Asgeri ilə nikahına toxunaraq, onun "saxta bir yayındırma" olduğunu və itki ilə mübarizə aparmaq üçün bir vasitə kimi göründüyünü vurğulayıb.

Hazırda Britni özünü sağalma prosesində hiss etdiyini, həmçinin bədəninə və həyatına yenidən nəzarəti qaytardığını qeyd edib:

"Yenidən uşaq kimi aclıq hissi keçirirəm. Yemək yeyəndə sanki bunu həyatımda ilk dəfə edirəm... Evimi sevirdim, amma orada həddən artıq ağrı və travma vardı".

Britni və Sem Asgeri 2016-cı ildə müğənninin "Slumber Party" klipinin çəkilişində tanış olublar. Cütlük 2021-ci ilin sentyabrında nişanlanıb, 9 iyun 2022-ci ildə – Spirsin üzərindəki qəyyumluq ləğv olunduqdan bir ay sonra evləniblər.

14 aylıq nikahdan sonra, 2023-cü ilin avqustunda Asgeri "barışmaz fikir ayrılıqları" səbəbi ilə boşanma üçün müraciət edib. 2 dekabr 2024-cü ildə boşanma rəsmən təsdiqlənib. Sem nikahı "nemət" adlandırıb və onların hərəsinin öz yoluna davam etdiyini bildirib.

"Pop musiqisinin şahzadəsi" adlandırılan amerikalı müğənni 1990-cı illərin sonu – 2000-ci illərin əvvəlində "Baby One More Time" və "Oops!… I Did It Again" kimi hitlərlə dünya şöhrəti qazanaraq öz nəslinin ən uğurlu ifaçılarından biri olub. Lakin onun karyerası və şəxsi həyatı daim qalmaqallarla müşayiət olunub. 2007-ci ildə Britni əsəb pozuntusu yaşayaraq iki oğlunun qəyyumluğunu itirib və uzun illər atasının – Ceymi Spirsin nəzarəti altında qalıb. Yalnız 2021-ci ildə bu qəyyumluq ləğv olunub.

Azadlığa çıxmasına baxmayaraq, müğənninin davranışları hələ də pərəstişkarlarının narahatlığına səbəb olur. Britni tez-tez sosial şəbəkələrdə qəribə, nizamsız və ya həddən artıq açıq paylaşımlar edir. Bu isə onun psixi vəziyyəti barədə müxtəlif şayiələr yaradır. Lakin müğənni özü bəyan edir ki, nəhayət, azad şəkildə və öz istəklərinə uyğun yaşayır.(qaynarinfo)