Dünyanın ən böyük aysberqi olan A23a yay mövsümündə Antarktida ərazisində öz sahəsinin 36%-ni itirib.

Yeniproqnoz.az xəbər verir ki, bu barədə Arktik və Antarktik Elmi-Tədqiqat İnstitutunun (AANİİ) "Telegram" kanalında məlumat verilib.

Bildirilib ki, aysberqin sahəsi 2730 kvadrat kilometrdən 1750 kvadrat kilometrə qədər azalıb. Əsas gövdədən hər biri 60-dan 300 kvadrat kilometrə qədər sahəyə malik olan üç böyük fraqment ayrılıb.

A23a ilk dəfə 1986-cı ildə Filxner şelf buzlağından ayrıldıqda onun sahəsi 4100 kvadrat kilometrdən çox idi.

Bir neçə onillik ərzində aysberq Ueddell dənizində dayazlıqda qalıb, daha sonra Antarktida yarımadasının sahil xətti boyunca hərəkət etməyə başlayıb. 2023-cü ilin sonunda açıq dənizə çıxıb və cərəyanların təsiri ilə təxminən 930 kilometr məsafə qət edərək 2025-ci ilin əvvəlində Cənubi Corciya adasının yaxınlığına çatıb. Adadan 80 kilometr məsafədə aysberq yenidən dayazlıqda ilişib və yanvardan may ayına qədər orada qalıb. Daha sonra adanın yaxınlığında sürüşməyə davam edib.(publika.az)