Binəqədi rayonu Biləcəri, Baksol və Binəqədi şossesi kəsişməsində 4 aydır davam edən qazıntı işləri ərazidə yaşayan sakinləri narazı salıb.

Bu barədə Yeniproqnoz.az -a Binəqədi sakinləri şikayət ünvanlayıb.

Qeyd edilib ki, hər gün yaranan tıxaclar insanların saatlarla yolda vaxt itirməsinə, eləcə də işə gecikməsinə səbəb olur.

“Müvəqqəti çətinlik olsa da, bilmək istərdik ki, bu problem nə zaman bitəcək. Müşahidəmizə əsasən deyə bilərik ki, işlər gec irəliləyir. Ərazidə texnika olsa da, baxırsan ki, iş getmir. Dərslərin başlamasına az qalıb, təmirin nə vaxt bitəcəyini bilmək istəyirik”,- deyə sakinlərin müraciətində bildirilir.

Azərbaycan Avtomobil Yolları üzrə Dövlət Agentliyindən (AAYDA) Yeniproqnoz.az -a bildirilib ki, ərazidə qazıntı işlər digər qurumlar tərəfindən aparılır, qurum isə ən sonda təmir işləri görür.

Təəssüf ki, həftəsonu olduğundan aidiyyəti dövlət qurumlarından qazıntıların hansı məqsədlə aparılması və nə vaxt bitəcəyi ilə bağlı məlumat almaq mümkün olmadı.

Mövzunu davam etdirəcəyik.

Billurə