Corciyada yerləşən böyük "Hyundai" müəssisəsində immiqrasiya orqanlarının genişmiqyaslı reydi zamanı ABŞ-da qanunsuz yaşamaq və işləməkdə şübhəli bilinən 475 immiqrant saxlanılıb.
Yeniproqnoz.az xəbər verir ki, bu barədə "CBS News" məlumat yayıb.
Corciya və Alabama ştatlarında Milli Təhlükəsizlik Təhqiqatlarına nəzarət edən xüsusi agent Stiven Şrənk cümə günü jurnalistlərə bildirib ki, saxlanılanların çoxu Koreya vətəndaşı olub, lakin onların dəqiq sayı məlum deyil.
Onun sözlərinə görə, həmin şəxslər müxtəlif şirkətlərdə, o cümlədən subpodratçılarda işləyiblər.
Şrənkin bildirdiyinə görə, yoxlama qeyri-qanuni işəgötürmə təcrübələri və digər federal cinayətlərə dair ittihamlarla bağlı bir neçə ay davam edən araşdırma çərçivəsində aparılıb.
Saxlanılanların çoxu Corciya ilə Florida ştatlarının sərhədinə yaxın Folston şəhərində yerləşən müvəqqəti saxlama təcridxanasına göndərilib.
ABŞ İmmiqrasiya və Gömrük Xidmətinin (ICE) cümə günü axşam yayılan bəyanatında bildirilir ki, əməliyyat zamanı həbs edilən şəxslər “vizalarının və ya statuslarının şərtlərini pozaraq qanunsuz işlədikləri” müəyyən edilib.
Həmidə İbrahimova