Batumi hava limanında məşhur israilli dələduz, “Tinder fırıldaqçısı” kimi tanınan Simon Leviev saxlanılıb.

“Yeniproqnoz.az ” xəbər verir ki, bu barədə Gürcüstanın “Rustavi-2” telekanalı ölkənin DİN-ə istinadla məlumat yayıb.

Məlumata görə, Leviev beynəlxalq axtarışdadır.

Əsl adı Şimon Hayut olan Simon Leviev onlarla qadını aldatmaqla məşhurlaşıb. O, qadınlarla "Tinder" tətbiqində tanış olur, özünü almaz maqnatının oğlu kimi təqdim edir və dəbdəbəli həyat tərzi nümayiş etdirirdi — şəxsi təyyarələr, bahalı hotellər, brend geyimlər. Qurbanlarının etimadını qazandıqdan sonra isə guya “düşmənlər” tərəfindən təhdidlər aldığına və ya müvəqqəti maliyyə çətinliklərinə düşdüyünə inandıraraq onlardan iri məbləğdə pul borc alırdı.

Jurnalist araşdırmalarına görə, o bu üsulla qadınlardan milyonlarla dollar qoparıb.

2019-cu ildə o, Yunanıstanda saxta pasportla saxlanılaraq İsrailə ekstradisiya olunub və orada fırıldaqçılıq və sənəd saxtakarlığına görə beş ay həbsdə yatıb.

Buna baxmayaraq, azadlığa çıxdıqdan sonra Leviev ictimai həyatda qalmaqda davam edib və hətta qalmaqallı məşhurluğunu pula çevirməyə çalışıb.