Rusiyada İstintaq Komitəsi təbliğatçı Vladimir Solovyovun şəxsi aktivləri ilə maraqlanmağa başlayıb. Bu, “Solovyov.Live” kanalı ilə bağlı xərclərin təhlilindən sonra üzə çıxıb. Qurum şübhələnir ki, layihənin saxlanılması üçün ayrılan vəsaitlərin bir hissəsi mənimsənilə bilər.

Yeniproqnoz.az xəbər verir ki, bu barədə Rusiya güc strukturlarına yaxın “Razvetçik” Teleqram kanalı İstintaq Komitəsindəki mənbələrə istinadən məlumat yayıb.

Məlumatda qeyd olunur ki, ilkin yoxlama zamanı Solovyovun Moskvada bir neçə “ofşor” şirkət vasitəsilə rəsmiləşdirilmiş daşınmaz əmlaka sahib olduğu müəyyən edilib. Bu obyektlərin ümumi dəyəri 340 milyon rublu (təxminən 3,7 milyon dollar) keçir. Hazırda İstintaq Komitəsi şirkətlər və kanalın maliyyə axınları arasındakı əlaqələri təhlil edir ki, mənimsəmə və gəlirlərin leqallaşdırılması ilə bağlı qanun pozuntularını müəyyən etsin.

Mənbənin sözlərinə görə, əgər yoxlama zamanı vəsaitlərin mənimsənilməsi ilə bağlı şübhələr təsdiqlənsə, istintaqçılar aşkar edilən bütün obyektlərə həbs qoyulması barədə məhkəməyə müraciət edəcəklər. Bu, istintaq başa çatana qədər əmlakın satılması və ya üçüncü şəxslərin adına keçirilməsinin qarşısını almağa imkan verəcək.

“Razvetçik” yazır ki, yüz milyonlarla rubl dəyərində daşınmaz əmlakının yoxlanmasına başlanıldıqdan sonra Vladimir Solovyov panikaya düşərək İstintaq Komitəsinin rəhbəri Aleksandr Bastrıkinə müraciət edib.

İstintaqa yaxın insayderin sözlərinə görə, söhbət son dərəcə gərgin atmosferdə keçib və cəmi bir neçə dəqiqə davam edib. Bu zaman Solovyov Bastrıkini inandırmağa çalışıb ki, onun əməkdaşları səhv ediblər.

Bastrıkin isə cavabında bildirib ki, yoxlama tamamilə qanun çərçivəsində aparılır və şəxsi müraciətlər araşdırmanın gedişinə təsir etmir. “Bastrıkin son dərəcə açıq və sərt danışıb: heç bir güzəşt və arxa qapı yoxdur”, – deyə mənbə qeyd edib.

İnsayderin sözlərinə görə, Solovyov vəziyyəti anlaşılmazlıq kimi təqdim etməyə və özünü müdafiə etməyə çalışsa da, komitə rəhbəri uzun izahata girməyib. Gərginlik daha da artıb və bir anda Solovyov “Yaxşı, kömək etdiyiniz üçün sağ olun” deyərək dəstəyi yerə qoyub.