Energetika və Təbii Sərvətlər Naziri Alparslan Bayraktar "CGTN Türk" kanalına verdiyi müsahibədə Türkiyə ilə Çin arasındakı energetika əməkdaşlığını qiymətləndirib.

Yeniproqnoz.az -ın məlumatına görə, Bayraktar bildirib ki, Çin ilə əməkdaşlıq mümkündür, xüsusilə nüvə və bərpa olunan enerji, enerji ötürülməsi və təbii sərvətlərin hasilatı sahələrində. O əlavə edib ki, Türkiyə enerji yığımı və batareya istehsalı sahəsində əhəmiyyətli imkanlar təqdim edir və Çin şirkətləri istehsal fəaliyyətlərini Türkiyədə yerləşdirməyi nəzərdən keçirir.

Energetika sektorunda Çin ilə mümkün yeni əməkdaşlıq layihələrindən danışan Bayraktar deyib: “Türkiyə və Çin müxtəlif regionlarda əməkdaşlıq edə bilər. Bunlara Afrika, Yaxın Şərq, Mərkəzi Asiya və Balkanlar daxildir. Türkiyə ilə Çin arasında əməkdaşlıq imkanları Şanxay Əməkdaşlıq Təşkilatının sammiti çərçivəsində son həftələrdə keçirilmiş görüşlərdə müzakirə olunub”.

Bayraktar Çin ilə dəniz külək elektrik stansiyası layihəsini də müzakirə etdiklərini bildirib: “Dəniz külək elektrik stansiyası layihəsi Türkiyədə ilk olacaq və bəlkə də onu Çin şirkətləri ilə birgə həyata keçirəcəyik. Yeni enerji ötürücü xətlərin inşasını planlaşdırırıq, xüsusilə Avropaya elektrik enerjisi çatdırmaq üçün. 2035-ci ilə qədər dəyəri təxminən 30 milyard dollar olan proqram elan etmişik və ona böyük maraq var. Bu proqram həmçinin Çin-in “Bir kəmər, bir yol” təşəbbüsü ilə tam uyğundur.”