İstedadları Tanıyaq və Tanıdaq İctimai Birliyinin təşkilatçılığı ilə 8 Noyabr – Zəfər Günü münasibətilə “Zəfərin Səsi” adlı tədbir keçirilib. Tədbir vətənpərvərlik ruhunun gücləndirilməsi, şəhidlərimizin əziz xatirəsinin anılması və istedadlı uşaqların, gənclərin təqdimatı məqsədilə təşkil olunub.
Tədbir Azərbaycan Respublikasının Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad edilməsi ilə başlayıb.
Daha sonra İstedadları Tanıyaq və Tanıdaq İctimai Birliyinin sədri Vüsalə Qələndərli (Sadıqova) çıxış edərək bildirib ki, 44 günlük Vətən müharibəsində xalqımızın göstərdiyi qəhrəmanlıq tariximizin ən parlaq səhifələrindən biridir. O, gənclərin Vətənə sevgi, milli ruh və mənəvi dəyərlər istiqamətində formalaşmasının əhəmiyyətini vurğulayıb.

Tədbirdə həmçinin “Yeni Proqnoz.az” saytının rəhbəri, jurnalist Xanım Bağırlı da çıxış edərək belə tədbirlərin gənc nəslin vətənpərvərlik tərbiyəsində mühüm rol oynadığını qeyd edib və İctimai Birliyin fəaliyyətini yüksək qiymətləndirib.
Tədbirdə QHT rəhbərləri, müəllimlər, mətbuat nümayəndələri, ictimaiyyət nümayəndələri və istedadlı uşaq və gənclər iştirak ediblər.
Səhnə proqramında istedadlı uşaq və gənclərin  ifasında Vətənə həsr olunmuş şeirlər, mahnılar səsləndirilib. Sonda tədbir iştirakçılarına təşəkkürnamələr təqdim olunub və xatirə fotosu çəkilib.