Yenə gəldi soyuq payız,
Göylər yalqız, yerlər yalqız.
Heyif, əlim yetmir sənə,
Ürəyimin yetdiyi qız.

Yağış yağanda bir gecə,
Su çiləyir ürəyimə.
Həyat verir o, gör necə,
Ölüb-dirilən sevgimə.

Kədər sıxanda qəlbimi,
Duyğularım aşıb-daşır.
Yadıma salanda səni,
Ruhum birdən rahatlaşır.

Ayaqlarımın altında,
Səsi gəlir xəzəllərin.
Yalnız hər an qulağımda,
Eşidilir sənin səsin.

Keçdiyimiz o yerlərdən,
Hərdən ötüb keçəndə mən,
O günlər düşür yadıma,
Min bir söz keçir qəlbimdən.

O qədər uzaqsan ki, sən,
Yuxumdan da əl çəkmisən.
O qədər yaxınsan ki, sən,
Həyatıma çevrilmisən.

Taleyin istehzası var,
Bu gün varam, sabah yoxam.
Hər bir dərdin dəvası var,
Mənim isə yoxdur dəvam.

Qoy belə keçsin saatım,
Qoy belə keçsin illərim.
Necə keçsə də həyatım,
Mənim hələ var ümidim,
Bu sevgiyə var ümidim…
18.10.2025.
Müəllif: Sevindik NƏSİBOĞLU