Müəllimlərin rəqəmsal bacarıqlarının artırılması və müasir tədris mühitinin formalaşdırılması məqsədi daşıyan “ICDL Workforce Teamwork” layihəsinin əsas mərhələlərindən biri olan təlimlərin icrasına başlanmışdır. Layihə çərçivəsində təşkil olunan təlimlər Sumqayıt şəhər C.Səfərov adına 10 nömrəli tam orta ümumtəhsil məktəbində təlimçi Aygün Cəfərova tərəfindən həyata keçirilir.

Beynəlxalq ICDL standartlarına uyğun hazırlanmış proqram əsasında 30 müəllim üçün ümumilikdə 30 saatlıq üz-üzə təlimlər təşkil olunur. Təlimlər hər biri 15 nəfərdən ibarət qruplarla aparılır və gündə 3 saat olmaqla 10 gün ərzində keçirilir. Proqram həm nəzəri, həm də praktiki hissələrdən ibarət olmaqla, müəllimlərin onlayn əməkdaşlıq alətlərindən səmərəli istifadə bacarıqlarını inkişaf etdirməyə yönəlib.



Təlimlər zamanı iştirakçılara virtual komanda mühitlərinin qurulması, onlayn əməkdaşlıq platformalarında effektiv ünsiyyətin təşkili, rəqəmsal alətlər vasitəsilə birgə işin planlaşdırılması və idarə olunması üzrə ətraflı bilik və bacarıqlar təqdim olunur. Müəllimlər əldə etdikləri bilikləri praktiki tapşırıqlar vasitəsilə möhkəmləndirir, real tədris situasiyalarına uyğun tətbiq etmə imkanları qazanırlar.

Eyni zamanda, iştirakçılar layihənin sonunda keçiriləcək beynəlxalq sertifikasiya imtahanına hazırlıq məqsədilə sınaq imtahanlarında və hazırlıq testlərində iştirak edirlər. Bu yanaşma müəllimlərin öz bilik və bacarıqlarını qiymətləndirməsinə, imtahan prosesinə daha inamla hazırlaşmasına şərait yaradır.

Layihənin icrası müəllimlərin peşəkar inkişafına mühüm töhfə verməklə yanaşı, məktəblərdə rəqəmsal əməkdaşlıq mədəniyyətinin formalaşmasına, dərs prosesində müasir texnologiyalardan məqsədyönlü və effektiv istifadənin genişlənməsinə xidmət edir. Bu isə nəticə etibarilə şagirdlər üçün daha interaktiv, çevik və innovativ tədris mühitinin yaranmasına imkan yaradır.