“CodePro for Teachers” qrant layihəsi çərçivəsində açılış tədbiri baş tutub.

Layihə çərçivəsində Bakı şəhərində fəaliyyət göstərən 30 nəfər informatika müəllimi üçün 36 saatlıq kodlaşdırma və Python üzrə üz-üzə təlimlər təşkil ediləcək. Təlimlər zamanı müəllimlərə kodlaşdırmanın əsas anlayışları, alqoritmik düşüncə, şərti və dövr operatorları, funksiyalar və proqramların sınaqdan keçirilməsi mövzuları praktiki tapşırıqlar və nümunələr əsasında öyrədiləcək. Layihə 6 ay müddətində icra olunacaq və yekunda müəllimlərin beynəlxalq ICDL Coding Principles imtahanında iştirakı təmin ediləcək. Bu proses müəllimlərin proqramlaşdırma bacarıqlarını artıracaq, onların beynəlxalq sertifikat əldə etməsinə və qazandıqları bilikləri şagirdlərə daha effektiv ötürməsinə imkan yaradacaq.

Xatırladırıq ki, “CodePro for Teachers” qrant layihəsi Təhsildə İnkişaf və İnnovasiyalar üzrə IX Qrant Müsabiqəsinin qalib layihələrindəndir və Elnur Mirzəyev tərəfindən Bakı şəhər 329 nömrəli tam orta ümumtəhsil məktəbində həyata keçirilir. Layihənin məqsədi Bakı məktəblərində çalışan informatika müəllimlərinin kodlaşdırma və Python dili üzrə bilik və bacarıqlarını artıraraq onları beynəlxalq ICDL Coding Principles imtahanına hazırlamaqdır.