Binəqədi rayonu, Biləcəri qəsəbəsində yerləşən 15 saylı poliklinika ağır itki ilə üzləşib. Poliklinikanın tanınmış və sevilən həkim-cərrahı Könül xanım Sultanova vəfat edib.
Könül Sultanova uzun illər peşəkar fəaliyyəti, yüksək savadı və insani keyfiyyətləri ilə həmkarlarının və pasiyentlərinin dərin hörmətini qazanmışdı.
İstərdim ki, Könül xanımı siz də tanıyasınız. Könül xanım çox savadlı həkim və eyni zamanda çox gözəl, mərhəmətli bir insan idi. Onun qəbuluna düşmək üçün səhər saat 7-dən növbəyə dayanmaq lazım olurdu. Bu həkim hər kəsə eyni gözlə baxar, heç kimi ayırmazdı.
Son görüşümüz 2025-ci ilin noyabr ayına təsadüf etmişdi. Gördüm ki, gözünün birini bağlayıb. Soruşdum: “Nə olub?” Gülümsəyərək “Bir şey deyil” dedi. Üzü hər zaman gülərdi. Heç kəsi ümidsiz göndərməzdi.
Belə həkimlərə çox az rast gəlinir.
15 saylı poliklinikada yeriniz hər zaman görünəcək, gözəl insan…
İnanın, bu sətirləri yazdıqca gözlərim yaşla dolur.
5 il oldu sizi tanıyırdım. Əvvəl doktorum oldunuz, sonra isə çox gözəl anlaşdığımız bir insan…
Gözəl bir ata məsəli var: “Adam var evdən gedər, adam da var eldən gedər.”
Siz eldən getdiniz, əzizimiz Könül həkim…
Bu dünyada cənnətinizə hazır olduğunuzu bilirəm.
Allah sizə rəhmət eləsin.
Məkanınız cənnət olsun, gözəl insan.
Xanım Bağırlı
YeniProqnoz.az saytının rəhbəri