“3D – dil dostum duolingo” layihəsi çərçivəsində onlayn görüş keçirilib
Təhsildə inkişaf və innovasiyalar üzrə IX qrant müsabiqəsinin qalibi olan “3D – dil dostum duolingo” layihəsi çərçivəsində şagirdlərlə onlayn görüş təşkil olunub. Görüş Microsoft Teams platforması üzərindən keçirilib.
Onlayn görüşün əsas məqsədi layihənin ikinci mərhələsinə start vermək, şagirdləri Duolingo rəqəmsal tədris platforması ilə yaxından tanış etmək və onların vahid virtual sinif mühitinə inteqrasiyasını təmin etmək olub.
Görüş zamanı şagirdlər üçün Duolingo platformasında fərdi hesablar yaradılıb, "Duolingo for Schools" üzərindən virtual sinif otağı qurulub və iştirakçılar həmin sinif otağına qeydiyyatdan keçərək layihəyə rəsmi şəkildə qoşulublar. Eyni zamanda platformanın əsas funksiyaları, gündəlik tapşırıqlar və öyrənmə qaydaları ətraflı izah edilib, ilk interaktiv tapşırıqlar birgə şəkildə icra olunub.
Onlayn görüş interaktiv və praktik formatda keçirilib. Şagirdlər prosesdə fəal iştirak edərək suallarını ünvanlayıb, öz gözləntilərini və maraqlarını bölüşüblər. Təlim zamanı onların motivasiyasının artırılmasına xüsusi diqqət yetirilib.
Qeyd edək ki, layihə 10–14 yaşlı şagirdlərin ingilis dili bacarıqlarının oyunlaşdırılmış, texnologiya əsaslı və fərdiləşdirilmiş şəkildə inkişaf etdirilməsini hədəfləyir. Layihənin növbəti mərhələlərində Duolingo platforması üzərindən mütəmadi tapşırıqların icrası, monitorinq və motivasiyaedici fəaliyyətlərin davam etdirilməsi nəzərdə tutulur.