“VR ilə İngilis dilini öyrən” layihəsi çərçivəsində təlimlər davam etdirilir. 
Bakı şəhər 57 nömrəli tam orta ümumtəhsil məktəbində “VR ilə İngilis dilini öyrən” adlı layihə çərçivəsində seminar təşkil olunub. Seminar Ofeliya Qafarova tərəfindən aparılıb. 
Seminarın əsas məqsədi ingilis dilinin tədrisini VR texnologiyaları vasitəsilə daha interaktiv və immersiv formada təşkil etmək, müəllimlərin virtual mühitlərdən istifadə etməklə danışıq, dinləmə və situativ ünsiyyət bacarıqlarını inkişaf etdirən dərs modellərini tətbiq etmək üzrə peşəkar səriştələrini formalaşdırmaqdır.
Seminardan əvvəl peşəkar təlimçi-ekspertləri tərəfindən seminar proqramı və layihə çərçivəsində istifadə olunacaq oxu materialı hazırlanıb. Seminarda 8, 9 və 10-cu sinif şagirdləri iştirak edib. İştirakçı müəllimlər seminardan sonra 8, 9 və 10-cu sinif şagirdlərindən ibarət üç sinifdə VR texnologiyalarından istifadə etməklə ingilis dili dərsləri təşkil edəcək, mövzuya uyğun virtual ssenarilər və tapşırıqlar tətbiq edəcək, şagirdlərin danışıq, dinləmə və ünsiyyət bacarıqlarının inkişafını dəstəkləyəcək və tədris prosesinin nəticələrini sistemli şəkildə qiymətləndirəcəklər.
Qeyd edək ki, layihənin məqsədi 8, 9 və 10-cu sinif  şagirdləri Mondly platformasında innovativ texnologiyalar (AR və VR) vasitəsilə ingilis dilinin öyrənilməsi prosesinə cəlb etmək və onların tədris nəticələrini yüksəltməkdir. Xatırladaq ki, layihə IX qrant müsabiqəsinin qalibi olub və Bakı şəhər 57 nömrəli tam orta ümumtəhsil məktəbində icra edilir.