“İstedadları Tanıyaq və Tanıdaq” İctimai Birliyinin bir qrup istedadlı üzvləri Dünya TV-nin “Bu səhər” verilişində qonaq olublar. Verilişdə birliyin fəaliyyəti, istedadlı uşaq və gənclərin inkişafı, eləcə də ailə-məktəb-müəllim əməkdaşlığının əhəmiyyəti geniş müzakirə olunub. Tədbir çərçivəsində bir sıra istedadlı gənclər mükafatlandırılıb. “İlin fəal gənci” fəxri diplomu ilə təltif olunanlar arasında gənc xanəndə İlqar Bayramlı da olub.
İstək varsa, yol var – İlqar Bayramlının Uğur Hekayəsi
Bayramlı İlqar Məzahir oğlu 15 may 2013-cü ildə Bakı şəhərində dünyaya göz açmışdır. Ailənin yeganə övladı olan İlqarın atası hərbçi, anası isə həkimdir. Erkən yaşlarından sənətə meyl göstərən İlqar ilk səhnə addımlarını hələ Xətai rayonu, 316 saylı bağçada təhsil alarkən atmışdır. Bağça tədbirlərində çıxışlar etmiş, mahnılar oxumuş, səhnəciklərdə iştirak etmiş və buraxılış gecəsində Müslüm Maqomayevin “Azərbaycan” mahnısını ifa etmişdir.
Məktəbəqədər hazırlıq və birinci sinfi 200 saylı məktəb-lisey kompleksində oxuyan İlqar pandemiya dövründə başlayan distant təhsil zamanı saatlarla telefonda muğam ifalarını dinləyərək xanəndəlik sənətinə böyük maraq göstərməyə başlayır.
Anası İlqarın diş həkimi olmasını arzulasa da, İlqarın qərarı qəti olur – o, xanəndə olmaq istəyir. Valideynləri isə bu çətin, lakin şərəfli sənət yolunda ona tam dəstək göstərməyə qərar verirlər. İlqar ilk addımlarını ustadı Aytən Məhərrəmovanın rəhbərliyi ilə atmağa başlayır. Səsi müəllimi tərəfindən bəyənilən İlqar muğam sənətinin sirlərini öyrənməyə başlayır.
İstedadlı gənc sənətçi Azərbaycan Milli Konservatoriyasının nəzdində fəaliyyət göstərən İncəsənət Gimnaziyasına qəbul olaraq peşəkar təhsil almağa başlayır. Qısa zaman ərzində o, bir çox tədbirlərdə, televiziya verilişlərində və müsabiqələrdə uğurla iştirak etmişdir.
2025-ci ildə "İstedadları Tanıyaq və Tanıdaq" İctimai Birliyi tərəfindən Şuşada – Cıdır düzündə təşkil olunan səfərdə çıxışı ilə bütün qonaqların diqqətini çəkmiş, səsi və ifası ilə böyük rəğbət qazanmışdır.
İlqarın uğur hekayəsi göstərir ki, istedad zamanında kəşf olunarsa və dəstəklənərsə, o, böyük zirvələrə ucalmaq potensialına malikdir. Bayramlı İlqar artıq bu yolda inamla addımlayır..
Hal- hazırda İlqarın ustadı Respublikanın Xalq artisti Gulyaz Məmmədovadır. İlqar bir çox müsabiqə qalibidir, çoxsaylı konsertlərdə çıxış edir. Dəfələrlə Azad Qarabağın bütün bölgələrində konsert proqramlarında çıxış edir.İlqarın fəxri diplomları arasında ən dəyərliləri Təhsil Naziri Emin Əmrullayev tərəfindən 2024 və 2025-ci illərdə Şuşada keçirilən Türkdilli Uşaqlar Forumunda iştirakına görə təqdim olunan diplomlardır. 2025-2026-cı ilin ən gözəl mükafatlarından isə İstedadları Tanıyaq və tanıdaq İctimai birliyinin təqdim etdiyi “ İlin fəal gənci" fəxri diplomudur.
İlqarın Ustadı hal-hazırda bir cox mahnılar, muğamlar üzərində çalışır. Ən böyuk arzusu alimlik dərəcəsini almaqdır.
Biz də gənc istedad İlqar Bayramlıya bu şərəfli yolda uğurlar arzulayırıq.
