Aviaşirkətlər və hava limanları baqaj əməliyyatlarında yaranan pozuntuları daha erkən mərhələdə müəyyən etməyə imkan verən yeni proqnozlaşdırıcı analitika həllindən yararlanmağa başlayırlar.

 

SITA Bag Radar əməliyyat baqaj məlumatlarını proqnozlaşdırıcı analitikaya çevirərək baqajın yanlış idarə olunmasının qarşısını almağa və əməliyyatların səmərəliliyini artırmağa kömək edir.

 

Cenevrə – 18 mart 2026 – Aviaşirkətlər, hava limanları və yerüstü xidmət göstərən qurumlar artıq baqajın ötürmə zamanı gecikməsi, səhv yönləndirilməsi və ya əməliyyat tıxacları kimi problemləri proqnozlaşdırıcı analitika vasitəsilə daha erkən mərhələdə aşkar edə biləcəklər. SITA şirkəti baqaj əməliyyatlarına dair məlumatları aydın və operativ qərarvermə üçün istifadə olunan intellektual məlumatlara çevirən bulud əsaslı analitika platforması – SITA Bag Radar-ı təqdim edib.

 

Baqajın yanlış idarə olunması hələ də aviasiya sektorunda ən görünən və maliyyə baxımından ən bahalı əməliyyat problemlərindən biri olaraq qalır. Əslində bu cür pozuntuların qarşısını almaq üçün lazım olan məlumatlar artıq aviaşirkətlərin və hava limanlarının istifadə etdiyi müxtəlif sistemlərdə mövcuddur. SITA Bag Radar bu məlumatları bir platformada birləşdirərək tarixi analiz, real vaxt monitorinqi və süni intellekt əsaslı proqnozlaşdırıcı yanaşmalar vasitəsilə riskləri hələ əməliyyatlara təsir etməzdən əvvəl müəyyən edir.

 

“SITA-da Baqaj üzrə direktor” vəzifəsini icra edən Nikol Hoqq bildirib: “Aviaşirkətlər və hava limanları hər gün böyük həcmdə baqaj məlumatı yaradır. Lakin bu məlumatlar uzun müddət yalnız problem baş verdikdən sonra araşdırma aparmaq üçün istifadə olunub. Sərnişin axını artdıqca əməliyyat komandalarının riskləri daha erkən görməsi və müdaxilə etməsi zəruridir. Qlobal baqaj məlumatlarını analitika və süni intellekt əsaslı proqnozlaşdırıcı yanaşmalarla birləşdirərək, SITA Bag Radar komandaların pozuntuları qabaqcadan müəyyən etməsinə və vaxtında müdaxilə etməsinə imkan yaradır.”

 

Platforma mövcud baqaj məlumat mənbələrinə, o cümlədən SITA Baggage Messaging vasitəsilə ötürülən baqaj məlumat mesajlarına (BIM), WorldTracer® sisteminə, Baqajın Uyğunlaşdırılması Sistemlərinə (BRS), Uçuşa Buraxılış İdarəetmə Sistemlərinə (DCS) qoşulur və seçilmiş üçüncü tərəf sistemləri ilə inteqrasiyanı təmin edir. Həll bu müxtəlif məlumat axınlarını vahid bulud əsaslı analitika mühitində birləşdirərək baqajın bütün hərəkət trayektoriyası üzrə tam görünürlük yaradır.

 

Əməliyyat komandaları bu sistem vasitəsilə yanlış yönləndirilmiş baqaj, ötürmə gecikmələri və ya yaranmaqda olan tıxaclar kimi riskləri daha erkən mərhələdə müəyyən edə bilirlər. Bu isə problemlərin böyüməsinin qarşısını almaq üçün vaxtında müdaxilə etməyə imkan verir.

 

Analitik məlumatlar veb-brauzer vasitəsilə əlçatan olan idarəetmə panelləri (dashboardlar) üzərindən təqdim olunur. Bu panellər baqaj və əməliyyat komandalarına performans göstəricilərini və potensial riskləri aydın şəkildə izləməyə imkan verir.

 

Problemlərə erkən mərhələdə müdaxilə edilməsi baqajın yanlış idarə olunması hallarını azaltmağa, əməliyyat səmərəliliyini artırmağa və həm emal, həm də kompensasiya xərclərini aşağı salmağa kömək edir. Nəticədə sərnişinlər daha az gecikmə və daha az itirilmiş baqaj halları ilə qarşılaşırlar.

 

SITA Bag Radar mövcud baqaj infrastrukturu ilə uyğun işləyir və artıq istifadə olunan məlumat mənbələrinə inteqrasiya olunur. Müştərilər bu həlli iri həcmli infrastruktur yatırımları və ya mürəkkəb sistem inteqrasiyası olmadan tətbiq edə bilərlər. Təşkilatlar ilkin mərhələdə tarixi analitika ilə başlayaraq, əməliyyatlarının inkişafına uyğun olaraq real vaxt monitorinqi və proqnozlaşdırıcı analitika funksiyalarını mərhələli şəkildə genişləndirə bilərlər. Həll həm ayrı-ayrı stansiyalarda, həm də bütöv əməliyyat şəbəkəsi üzrə tətbiq oluna bilər.