"İstedadları Tanıyaq və Tanıdaq” İctimai Birliyi Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə  “İstedadlar Akademiyası” layihəsinin icrasına başlayıb.
Qeyd edək ki, layihənin əsas məqsədi Bakı və Gədəbəy rayonundan olan istedadlı uşaqların aşkar edilməsi, onların yaradıcılıq bacarıqlarının inkişaf etdirilməsi və ictimaiyyətə tanıdılmasıdır. Bu çərçivədə məktəblərlə əməkdaşlıq ediləcək, seçilmiş uşaqlar üçün regionlarda təlimlər təşkil olunacaq.
Təlim proqramına rəsm, musiqi, rəqs, xanəndəlik, aşıq yaradıcılığı, qiraətçilik və instrumental musiqi alətlərində ifaçılıq sahələri daxildir. Eyni zamanda layihə müddətində uşaqlar üçün 7 motivasiya seminarı keçiriləcək və tanınmış yaradıcı şəxslərin iştirakı ilə onların inkişafına dəstək göstəriləcək.
Layihə çərçivəsində həm Gədəbəydə, həm də Bakıda ustad dərsləri və təqdimat tədbirləri təşkil olunacaq. Xüsusilə Bakıda rəsm, rəqs, xanəndəlik, aşıq yaradıcılığı, qiraətçilik və instrumental musiqi alətlərində ifaçılıq üzrə peşəkar ustad dərslərinin keçirilməsi nəzərdə tutulur.
Sonda Bakıda genişmiqyaslı yekun sərgi və konsert proqramı baş tutacaq. Tədbirdə iştirakçıların rəsm əsərləri nümayiş etdiriləcək, musiqi və rəqs çıxışları təqdim olunacaq.
Layihənin rəhbəri və birliyin sədri Vüsalə Sadıqova (Qələndərli) qeyd edib ki, bu təşəbbüs regionlarda yaşayan istedadlı uşaqların inkişafına, onların özünəinamının artırılmasına və gələcək yaradıcılıq karyeralarına mühüm töhfə verəcək.