Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və "Körpü" Türkman İrsi Araşdırmaları Mərkəzi İctimai Birliyinin birgə təşkilatçılığı ilə keçirilən "II Türkman İrsi: Vətəndaş Cəmiyyətlərinin Həmrəyliyi" forumu sadəcə bir tədbir deyil, ortaq tariximizə, mədəniyyətimizə və gələcəyimizə uzanan möhkəm bir körpü oldu. Vətəndaş cəmiyyəti nümayəndəsi olaraq, bu möhtəşəm platformada iştirak etmək mənim üçün qürurverici idi.

Bu forumdan mənə qalan ən dərin təəssüratları bir neçə mühüm məqamda bölüşmək istərdim:

Forum çərçivəsində keçirilən "Nə yaxınmış uzaqlar..." adlı panel müzakirələri tədbirin ən təsirli və yaddaqalan hissəsi olduğunu düşünürəm. Bu adın özündə belə çox dərin bir fəlsəfə, böyük bir həsrət və qovuşma sevinci var idi. Müzakirələr zamanı bir daha şahid olduq ki, aradakı məsafələr, coğrafi sərhədlər mənəvi bağlılığın qarşısını ala bilməz. Türkman irsinin hər bir naxışı, hər bir kəlməsi bizə uzaq görünən yolların əslində qəlbimizdə nə qədər yaxın olduğunu hiss etdirdi. Biz eyni kökdən, eyni mədəniyyətdən güc alan bir millətik və bu panel bizə bu doğmalığı yenidən yaşatdı. Necə deyərlər ürəklər bir olduqdan sonra məsafənin fərqi yoxdur. 

Forumun adında da qeyd olunduğu kimi, "Həmrəylik" bu günün ana xəttini təşkil edirdi. Müxtəlif qeyri-hökumət təşkilatlarının, ziyalıların və araşdırmaçıların bir araya gələrək ortaq hədəflər naminə fikir mübadiləsi aparması, vətəndaş cəmiyyətinin gücünü bir daha nümayiş etdirdi. 

Bu forum sadəcə keçmişə baxış deyil, həm də gələcəyə yönəlmiş böyük planların başlanğıcı idi. QHT-lər arasında qurulan yeni əlaqələr, gələcək birgə layihələr və mədəniyyət mübadiləsi üçün açılan yeni qapılar forumun ən böyük uğurlarından biridir. İnanıram ki, bu həmrəylik yeni-yeni yaradıcı ideyalara, xüsusilə gənclərin və istedadların bu irsi fəxrlə yaşatması üçün keçiriləcək yeni layihələrə və mədəniyyət festivallarına yol açacaq.

Bizə "uzaqların əslində nə qədər yaxın olduğunu" bir daha xatırladan, bu möhtəşəm layihənin ərsəyə gəlməsində əməyi olan Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə, "Körpü" Türkman İrsi Araşdırmaları Mərkəzi İctimai Birliyinə və bütün iştirakçılara dərin təşəkkürümü bildirirəm. Birliyimiz daim olsun, ortaq irsimiz hər zaman gələcək yollarımızı işıqlandırsın!