“VR ilə İngilis Dilini Öyrən” layihəsinin bağlanış tədbiri keçirildi

Məktəbimizdə həyata keçirilən “VR ilə İngilis Dilini Öyrən” layihəsinin bağlanış tədbiri uğurla baş tutdu. Tədbirdə layihənin icrası müddətində əldə olunan nəticələr təqdim edildi, iştirakçılarla fikir mübadiləsi aparıldı və virtual reallıq (VR) texnologiyalarının təhsil prosesində yaratdığı yeni imkanlar xüsusi diqqətə çatdırıldı.

Tədbirdə məktəbin direktoru Aytən Sadıqova, layihə rəhbəri Cəmilə Bədəlzadə, layihənin təlimçisi, müəllimlər və şagirdlər çıxış edərək layihə çərçivəsində qazandıqları bilik və bacarıqları, əldə olunan nailiyyətləri, həmçinin VR texnologiyalarının ingilis dilinin öyrədilməsi prosesinə verdiyi müsbət töhfələri bölüşdülər.

Çıxışlarda vurğulandı ki, layihə şagirdlərin xarici dilə marağının artırılmasına, dərslərdə fəal iştirakına və müasir texnologiyalardan səmərəli istifadə bacarıqlarının inkişafına mühüm töhfə verib. Tədbir iştirakçıları layihənin gələcəkdə də davam etdirilməsinin əhəmiyyətini qeyd edərək, bu istiqamətdə yeni təşəbbüslərin həyata keçirilməsinə ümid etdiklərini bildirdilər.

Bağlanış mərasimində layihədə fəal iştirak edən şagirdlər sertifikat və hədiyyələrlə təltif olundular. Tədbir xatirə şəkillərinin çəkilməsi ilə yekunlaşdı.

Qeyd edək ki, “VR ilə İngilis Dilini Öyrən” layihəsi şagirdlər tərəfindən böyük maraq və rəğbətlə qarşılanmış, innovativ tədris metodlarının tətbiqinin effektivliyini bir daha nümayiş etdirmişdir.