30 iyul – Ümumdünya İnsan Alverinə Qarşı Mübarizə Günü münasibətilə Ağcabədi rayonunda "İnsan alverinin müasir formaları və insan alverinə qarşı mübarizədə institusional mexanizmlər" mövzusunda maarifləndirici tədbir keçirilib.
Tədbir İnsan Alverinə Qarşı Mübarizə üzrə QHT Koalisiyası, Ağcabədi regional "ASAN xidmət" mərkəzi, Ağcabədi Rayon Polis Şöbəsi və Sosial Xidmətlər Agentliyinin Qarabağ regional filialının tərəfdaşlığı ilə təşkil olunub.
Tədbirin əsas məqsədi insan alverinin müasir dövrdə dəyişən formaları, xüsusilə informasiya texnologiyalarının inkişafı fonunda yaranan yeni risklər barədə ictimai məlumatlılığı artırmaq, aidiyyəti qurumlar arasında əməkdaşlığı gücləndirmək və insan alverinə qarşı mübarizədə tətbiq olunan institusional mexanizmlərin effektivliyini müzakirə etmək olub.
Tədbir insan alverinin müasir formalarına həsr olunmuş videoçarxın nümayişi ilə başlayıb. Daha sonra videoformatda çıxış edən İnsan Alverinə Qarşı Mübarizə üzrə QHT Koalisiyasının sədri Mehriban Zeynalova 30 iyul – Ümumdünya İnsan Alverinə Qarşı Mübarizə Gününün əhəmiyyətindən, insan alverinin cəmiyyət üçün yaratdığı təhlükələrdən, bu cinayət növünün qarşısının alınmasında dövlət–vətəndaş cəmiyyəti əməkdaşlığının vacibliyindən və ictimai maarifləndirmənin rolundan bəhs edib.
Ardınca Uşaq və Qadın Dəstək Xəttinin rəhbəri, İnsan Alverinə Qarşı Mübarizə üzrə QHT Koalisiyasının İdarə Heyətinin üzvü Kəmalə Aşumova qaynar xəttə daxil olan müraciətlərin xarakteri, müraciət edən şəxslərə göstərilən sosial, hüquqi və psixoloji dəstək, eləcə də həyata keçirilən müdaxilə tədbirləri barədə iştirakçılara ətraflı məlumat verib.
Panel müzakirələri İnsan Alverinə Qarşı Mübarizə üzrə QHT Koalisiyasının üzvü Radə Qafarovanın moderatorluğu ilə keçirilib. Moderator giriş nitqində qeyd edib ki, insan alverinə qarşı mübarizə yalnız hüquqi tədbirlərlə məhdudlaşmır. Bu istiqamətdə profilaktik fəaliyyət, erkən aşkar etmə mexanizmlərinin tətbiqi, zərərçəkmiş şəxslərə sosial dəstəyin göstərilməsi və aidiyyəti qurumların koordinasiyalı əməkdaşlığı mühüm əhəmiyyət daşıyır.
Paneldə Ağcabədi regional "ASAN xidmət" mərkəzinin Vətəndaşların Hüquqlarının Təminatı sektorunun müdiri Rafiz İbrahimov, Ağcabədi Rayon Polis Şöbəsinin Cinayət Axtarış Bölməsinin baş əməliyyat müvəkkili Rauf Məmmədov və Sosial Xidmətlər Agentliyinin Qarabağ regional filialının müdiri Elnur Həsənov çıxış edərək insan alveri cinayətlərinin qarşısının alınması istiqamətində görülən işlər, vətəndaş hüquqlarının müdafiəsi, zərərçəkmiş şəxslərin sosial reabilitasiyası və dövlət qurumları arasında əməkdaşlığın praktiki nəticələri barədə fikirlərini bölüşüblər. Müzakirələr zamanı iştirakçıların sualları cavablandırılıb, mövzu ətrafında geniş fikir mübadiləsi aparılıb.
Tədbirdə dövlət qurumlarının, qeyri-hökumət təşkilatlarının, gənclərin və ictimaiyyət nümayəndələrinin fəal iştirakı insan alverinə qarşı mübarizədə institusional əməkdaşlığın, birgə fəaliyyətin və ictimai həmrəyliyin əhəmiyyətini bir daha nümayiş etdirib.