İyulun 25-də Azərbaycan Milli Qeyri - Hökümət Təşkilatları forumun akt zalında Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “İstedadları Tanıyaq və Tanıdaq” İctimai Birliyinin təşkilatçılığı ilə həyata keçirilən “İstedadlar Akademiyası” layihəsi çərçivəsində yekun hesabat konserti və sərgisi təşkil olunub.
Tədbir Azərbaycan Respublikasının Dövlət Himninin səsləndirilməsi və Vətən uğrunda canından keçmiş əziz şəhidlərimizin xatirəsinin bir dəqiqəlik sükutla yad edilməsi ilə başlayıb. Daha sonra layihə çərçivəsində keçirilən ustad dərslərini və görülən işləri əks etdirən qısa videorolik nümayiş olunub.
Çıxış edən təşkilat sədri və layihə rəhbəri Vüsalə Qələndərli layihənin əhəmiyyətindən söz açaraq, bu cür təşəbbüslərin reallaşmasında dövlətin göstərdiyi diqqət və dəstəyi xüsusi vurğulayıb. O, layihə müddətində görülən işlər barədə ətraflı məlumat verərək, gənc istedadların üzə çıxarılması istiqamətində fəaliyyətin davamlı olacağını diqqətə çatdırıb.
Şəhid anası Nailə xanım çıxışında layihə çərçivəsində görülən işləri və uşaqların inkişafına göstərilən qayğını yüksək qiymətləndirib. Layihədə tədris aparan ustad müəllimlər də böyük əməyin nəticəsi olan bu uğurları yüksək dəyərləndirərək gənclərə gələcək fəaliyyətlərində uğurlar arzulayıblar. Tədbirdə çıxış edən qonaqlar layihə təşkilatçılarına və iştirakçılarına öz ürək sözlərini və təbriklərini çatdırıb.
Rəsmi hissədən sonra istedadlı uşaq və gənclərin ifasında bir-birindən maraqlı musiqi və rəqs nümayişləri, səhnə çıxışları təqdim olunub.
Tədbir çərçivəsində həmçinin uşaqların və gənclərin əl işlərindən və rəsmlərindən ibarət rəngarəng sərgi təşkil edilib, qonaqlar üçün çay fasiləsi verilib. Ustad dərslərində fəal iştirak edən müəllimlər və tələbələr diplomla təltif edilib.
Tədbir iştirakçılar tərəfindən böyük maraq və coşqu ilə qarşılanıb.
Qeyd edək ki, "İstedadlar Akademiyası" layihəsi çərçivəsində keçirilən ustad dərslərini peşəkar müəllimlər və tanınmış simalar tədris ediblər:
Xanəndəlik və ifaçılıq üzrə: tanınmış xanəndə, pedaqoq Maya Cəbrayılova;
Rəssamlıq üzrə: Qabaqcıl təhsil işçisi, Azərbaycan Rəssamlar İttifaqının üzvü, "RM ART" studiyasının direktoru Rəsmiyyə Mahmudova;
Rəqs üzrə: Bakıda keçirilən ustad dərslərini "Azərbaycan Milli Rəqsləri" kitabının müəllifi, xoreoqraf Amil Əhmədov, Gədəbəydə isə Elmira Musayeva;
Qiraətçilik üzrə: "Tərəqqi" medalı mükafatçısı, şair-publisist Nəsibə İsrafilqızı;
Aşıq yaradıcılığı üzrə: Bakıda keçirilən ustad dərslərini 24 nömrəli 11 illik musiqi məktəbinin saz ixtisası üzrə müəllimi, aşıq Cavanşir Quliyev, Gədəbəydə isə aşıq Toğrul Gədəbəyli;
İnstrumental musiqi alətlərində ifaçılıq üzrə: Piano üzrə ustad dərslərini Əməkdar artist, pianoçu Nərgiz Əliyeva və inklüziv təhsil üzrə beynəlxalq dərəcəli mütəxəssis, pianoçu Fəridə Tağıyeva; nağara üzrə ustad dərsini isə 24 nömrəli 11 illik musiqi məktəbinin nağara ixtisası üzrə müəllimi Əcbər Ramazanov böyük ustalıqla tədris ediblər.
informator.az
