Bu ilin iyun ayında Avropa İttifaqında təbii qaz istehlakı illik müqayisədə 1,4% artaraq 16,6 mlrd. kubmetr olub.
Bu barədə “APA-Economics” Qaz İxrac edən Ölkələr Forumunun (Gas Exporting Countries Forum - GECF) hesabatına istinadən xəbər verir.
Hesabata görə, tələbatın artımı əsasən elektrik enerjisi sektoru hesabına baş verib. Belə ki, Avropanın böyük hissəsini əhatə edən güclü istilər elektrik enerjisinin soyutma məqsədilə istehlakını artırıb, külək və hidroenerji istehsalının azalması isə qazla işləyən elektrik stansiyalarından istifadənin genişlənməsinə səbəb olub.
Bildirilir ki, eyni dövrdə ABŞ-da təbii qaz istehlakı illik müqayisədə 5,8% azalaraq 63,7 mlrd. kubmetr səviyyəsində olub.
“Bu azalma əsas istehlakçı sektorların hamısında tələbatın zəifləməsi ilə əlaqədar olub. Yaşayış və kommersiya sektorlarında təbii qaz istehlakı havaların daha mülayim keçməsi nəticəsində isitmə və soyutma tələbatının azalması fonunda illik müqayisədə 15% azalıb. Sənaye sektorunda qaz istehlakı nisbətən sabit qalaraq cəmi 0,8% azalıb. Elektrik enerjisi sektorunda isə bərpa olunan enerji mənbələri və nüvə energetikasının rəqabət qabiliyyətinin artması nəticəsində təbii qaz istehlakı illik müqayisədə 1,6% aşağı düşüb”, - hesabatda qeyd olunur.
Xatırladaq ki, 2020-ci il dekabrın 31-dən Trans-Adriatik boru kəməri (TAP) vasitəsilə Avropaya Azərbaycan qazının nəqlinə başlanılıb.