"United Center" Nitq və Psixoloji İnkişaf Mərkəzində xüsusi qayğıya ehtiyacı olan şəxslərin cəmiyyətə inteqrasiyası, onların hüquqlarının müdafiəsi və ailələrinə dəstək göstərilməsi məqsədilə geniş tərkibli tədbir keçirilib. Görüşdə mərkəzin əməkdaşları, psixoloqlar, valideynlər, QHT və mətbuat nümayəndələri iştirak ediblər.
Tədbiri giriş sözü ilə açan Mərkəzin və yeni yaradılan İctimai Birliyin rəhbəri Kamilə Nuriyeva təşəbbüsün əsas məqsədi və gələcək planlar barədə ətraflı məlumat verib. Kamilə Nuriyeva bildirib ki, təşkilatın əsas qayəsi xüsusi qayğıya ehtiyacı olan şəxslərə və onların ailələrinə hərtərəfli dəstək olmaq, onların reabilitasiya və sosiallaşma prosesini daha effektiv təşkil etməkdir.
Görüş zamanı mütəxəssislər müasir terapiya metodları və psixoloji dəstək mexanizmləri barədə çıxışlar edib, valideynlər isə qarşılaşdıqları çətinlikləri bölüşərək belə bir platformanın yaradılmasının vacibliyini vurğulayıblar. Tədbir çərçivəsində QHT və mətbuat nümayəndələri ilə də fikir mübadiləsi aparılıb, sosial maarifləndirmənin artırılması üçün birgə addımların atılması qərara alınıb.
Yaradılan İctimai Birliyin əsas fəaliyyət istiqamətləri:
"United Center" Nitq və Psixoloji İnkişaf Mərkəzin və yeni yaradılan İctimai Birliyin rəhbəri Kamilə Nuriyeva bldirib ki, Birliyin əsas fəaliyyət istiqamətləri Kompleks Dəstəkdir. Xüsusi ehtiyaclı şəxslərə professional psixoloji, loqopedik və reabilitasiya xidmətlərinin təşkili.
Ailələrə Arxa Olmaq: Valideynlərin psixoloji və hüquqi maarifləndirilməsi, onlara mənəvi dəstək göstərilməsi.
İnklüzivlik və Maarifləndirmə: Cəmiyyətdə fərqindəliyi artırmaq üçün media və QHT-lərlə birgə sosial layihələrin icrası.
Əməkdaşlıq: Dövlət, özəl sektor və vətəndaş cəmiyyəti institutları ilə tərəfdaşlığın qurulması.
Mərkəzin və yeni İctimai Birliyin rəhbəri Kamilə Nuriyeva vurğulayıb ki, bu birlik təkcə bir dəstək mərkəzi deyil, xüsusi ehtiyaclı fərdlərin potensialını reallaşdırmaq və onları cəmiyyətin fəal üzvünə çevirmək üçün mühüm bir sosial platforma olacaqdır.