25 sentyabr 2026-cı ildə Azərbaycan Milli Elmlər Akademiyasının Mərkəzi Elmi Kitabxanasında gənc yazar, 9 kitab müəllifi, AYB və AJB üzvü Sevindik Nəsiboğlunun Vətən müharibəsi şəhidlərinə həsr etdiyi “Dirçələn Xarıbülbül” adlı kitabının təqdimat mərasimi keçirildi.
Tədbirdə görkəmli ədəbiyyatşünas elm xadimləri, şəhid ailələri və gənc fəallar iştirak etdilər. Tədbirin aparıcısı, Azərbaycan Yazıçılar Birliyinin və Azərbaycan Jurnalistlər Birliyinin üzvü, Beynəlxalq Rəsul Rza mükafatı laureatı, Prezident təqaüdçüsü, “Kredo” qəzetinin baş redaktoru Əli Rza Xələfli bütün tədbir iştirakçılarını salamlayaraq tədbiri öz giriş nitqi ilə açıq elan etdi. Sonra Azərbaycan Respublikasının Dövlət Himni səsləndirildi, Ulu Öndərimiz Heydər Əliyevin və Vətənimizin bütövlüyü uğrunda canından keçən Şəhidlərimizin xatirəsi bir dəqiqəlik sükutla yad edildi. Əli Rza müəllim çıxışına davam edərək gənc müəllif və onun yaradıcılığı haqqında tədbir iştirakçılarını məlumatlandırdı. Sevindik Nəsiboğlunun uşaq yaşlarından başlayan və davam edən ədəbi-publisistik fəaliyyətinin dərinliklərindən söhbət açaraq onu publisistikamızın “gənc hökmdarı, cəngavəri” adlandırdı. Məhəmməd Hadi irsinin yorulmaz tədqiqatçısı, yazıçı-ədəbiyyatşünas, “Qızıl qələm” mükafatı laureatı İslam Qəribli çıxışında müəllifin hələ 5-ci sinifdən Əli Rza Xələflinin baş redaktoru olduğu “Kredo” qəzetində hər həftə məqalələrinin dərc edildiyini, o vaxtdan Sevindik Nəsiboğlunun yaradıcılığı ilə tanış olduğunu və yüksək qiymətləndirdiyini bildirdi. O, müəllifin yaradıcılığı ilə paralel olaraq təhsil həyatının da uğurlu olduğuna diqqət çəkdi. Bildirdi ki, yüksək balla Milli Aviasiya Akademiyasının hüquqşünaslıq ixtisasına qəbul olması onun həm istedadlı, həm də savadlı olduğunun göstəricisidir. Filologiya üzrə fəlsəfə doktoru, dosent İlham Məmmədli də gənc yazarın fəaliyyətindən söz açaraq ona yeni-yeni yaradıcılıq uğurları arzuladı. Filologiya elmləri doktoru, professor Asif Rüstəmli dövlət himnimizin sözlərini misal çəkərək Sevindik Nəsiboğlunun vətənin namusunu hifz etməyə, bayrağını yüksəltməyə müştaq olan, yəni can atan gənclərin həyatını, taleyini bu kitabla izlədiyini, onların Vətən, millət haqqında düşüncələrini duyaraq kitabındakı yazılarında əks etdirdiyini bildirdi.
Sonra tədbirdə söz şəhid ailələrinə verildi. İtkin şəhid Elşad Bağırovun bacısı Təranə Bağırova şəhid qardaşı ilə bağlı tədbir iştirakçılarını məlumatlandırdı, həmişə onun yolunu gözlədiklərini bildirdi. Sevindik Nəsiboğlu kimi yazarlara Şəhidləri unutmadığı, unutdurmadığı üçün təşəkkürünü bildirdi, uğurlar arzuladı. Şəhid baş çavuş Səid Cəfərovun anası Könül xanım, şəhid mayor Emin Süleymanovun həyat yoldaşı Məhsəti xanım çıxışlarında gənc yazara həyat və yaradıcılıq fəaliyyətində uğurlar arzuladılar. Şəhid Fəxri Məmmədovun anası Kəmalə xanım Sevindik Nəsiboğlunun təmənnasız şəkildə Şəhidlərimizin həyat yolunu işıqlandırdığına diqqət çəkdi. Gənc yazara və onun ailəsinə bu xidmətlərə görə dərin təşəkkürünü bildirdi. Şəhid Qara Balakişiyevin həyat yoldaşı Alidə xanım Sevindik Nəsiboğlunun ondan götürdüyü müsahibənin də kitabda çap olunduğunu söylədi. Müsahibəni və digər yazıları oxuduqca gənc müəllifin cənnət mələkləri adlandırılan Şəhidlərin həyatını oxucuların diqqətinə necə təsirli şəkildə canlandırdığından söz açdı. Şəhidlərimizin silaha, Sevindik Nəsiboğlu və onun timsalında sənət, söz adamlarının isə qələmə sarılaraq Vətən yolunda cəngavərlik etdiklərini dedi. Şəhid Qəzənfər Mütəllimovun həyat yoldaşı Zöhrə xanım da həyat yoldaşı ilə bağlı xatirələrindən danışaraq öz növbəsində gənc yazara uğurlar arzuladı. Şəhid Mirsüleyman Süleymanovun anası Mətanət xanım gənc yazarın vətənpərvərliyinə və doğma yurda olan bağlılığına diqqət çəkdi. Şəhid polkovnik-leytenant Mehman Qənbərovun həyat yoldaşı Xuraman xanım bu tədbirdə iştirak etməyin qürurverici olduğunu söylədi, gənc müəllifə dərin təşəkkürlərini və arzularını çatdırdı. Şəhid leytenant Nurlan Həsənovun atası Nadir Həsənov Sevindik Nəsiboğlunun Nurlan Həsənova “Zəfəri nurlandıran Nurlan” adlı kitabını həsr etdiyini, kitabın AMEA-nın Mərkəzi Elmi Kitabxanasında və Şuşa Dövlət Musiqili Dram Teatrında təqdimat mərasiminin keçirildiyini iştirakçıların diqqətinə çatdırdı. O da öz növbəsində gənc yazara ürək sözlərini söylədi.
AJB və AYB üzvü Nəzakət Kərimova-Əhmədova kitabın müəllifi olan Sevindik Nəsiboğlunun gördüyü işlər və yaradıcılıq fəaliyyətindən söz açdı, ona uğurlar arzu etdi.
Şəhid Yasin və Yusif Əhmədovların anası Nailə xanım çıxışında bütün Şəhidlərimizin qəhrəmanlığını vurğuladı. Eyni zamanda Şəhidlərimizin qəhrəmanlığını işıqlandırdığı üçün Sevindik Nəsiboğlu kimi müəlliflərin də qəhrəman olduğunu söylədi. Gənc müəllifə və ailəsinə dərin təşəkkürlərini bildirərək onlara xoş arzularını, diləklərini ünvanladı. Şəhid Ülvi Bağırovun anası Gülxas xanım da gənc müəllifə öz növbəsində təşəkkürlərini və xoş sözlərini söylədi.
Filologiya elmləri doktoru, AMEA-nın N. Gəncəvi adına Ədəbiyyat İnstitutunun Ədəbi tənqid şöbəsinin müdiri, Azərbaycan Yazıçılar Birliyinin və Azərbaycan Jurnalistlər Birliyinin üzvü Vaqif Yusifli çıxışında Məhəmməd Füzuli kimi Azərbaycan dahilərindən misallar gətirərək vətənimizin qəhrəmanlar ölkəsi olduğundan və xalqımızın, dövlətimizin öz qəhrəmanlarına verdiyi yüksək dəyərdən danışdı. Sevindik Nəsiboğlunun yaradıcılığını elmi-ədəbi əsaslarla yüksək qiymətləndirərək bildirdi ki, təqdimat mərasimi keçirilən “Dirçələn Xarıbülbül” kitabı mükafata layiq qiymətli bir əsərdir. Vaqif Yusifli çıxışının sonunda kitabın geniş oxucu auditoriyası tərəfindən yüksək qiymətləndiriləcəyinə və gənc yazarın gələcək fəaliyyətinə olan inamını vurğulayaraq uğurlar arzuladı.
Tədbirdə iştirak edən gənc fəallar Əli Xudatzadə və Şəhriyar Məmmədzadə, həmçinin müəllifin tələbə yoldaşı Ayxan Qələndərov da Allahdan Şəhidlərimizə rəhmət diləyərək müəllifə yaradıcılıq uğurları arzuladılar. Xanəndə Vəsilə xanım Quliyeva müəllifin “Zəfər tarixi” şeirindən bir parçanı segah üstündə ifa etdi.
“Dirçələn Xarıbülbül” kitabının müəllifi Sevindik Nəsiboğlu çıxış edərək bütün tədbir iştirakçılarına təşəkkürünü bildirdi, onların dəstəklərini ürəkdən hiss etdiyini söyləyərək gələcək tədbirlərdə görüşmək arzusunu da diqqətə çatdırdı. Filologiya elmləri doktoru, professor Asif Rüstəmli təkrarən çıxış edərək uşaq yaşlarından etibarən hər zaman Sevindik Nəsiboğlunun yaradıcılığına dəstək və yön verən, “Kredo” qəzetinin qapılarını onun üzünə açan Əli Rza Xələfliyə təşəkkürlərini bildirdi. Gənc müəllifin atası, Azərbaycan Respublikası Vəkillər Kollegiyasının üzvü Nəsib Əliyev bütün tədbir iştirakçılarını salamlayaraq gənclərə dövlətimizin verdiyi dəyərin ən qiymətli nişanəsi kimi “Dirçələn Xarıbülbül” kitabına təqdimatın keçirilməsinə öz dəstəyini əsirgəməyən, AMEA-nın prezidenti çox hörmətli İsa müəllim Həbibbəyliyə dərin təşəkkürünü bildirdi. Tədbir gənc müəllifin şəhid baş çavuş Səid Zəfər oğlu Cəfərovun və onun timsalında bütün Şəhidlərimizin əziz xatirəsinə ithaf etdiyi “Zəfərin oğlu” adlı şeirini söyləməsi ilə yekunlaşdı. Sonda gənc müəllif oxucularına imzalı kitablarını təqdim etdi və xatirə fotoşəkilləri çəkdirildi.
Biz də öz növbəmizdə “Dirçələn Xarıbülbül” kitabının geniş oxucu auditoriyası tərəfindən yüksək qiymətləndiriləcəyinə və müəllifin gələcək fəaliyyətində uğurlar qazanacağına inanırıq!
Allah bütün Şəhidlərimizə rəhmət eləsin! Amin!
 
NƏZAKƏT EMİNQIZI
Yazar-publisist, AYB, AJB və PEN Klubun üzvü
26.09.2026