Azərbaycan elminin və ali təhsilinin inkişafında müstəsna xidmətləri olan dəyərli pedaqoq, iqtisad elmləri namizədi, dosent Sədaqət Əbdürrəhmanovanın doğum gününüdür.
Sədaqət müəllimə elmi fəaliyyəti dövründə müəllim, baş müəllim, kafedra müdiri, magistratura dekanı və Qadınlar Şurasının sədri kimi məsuliyyətli və şərəfli vəzifələri uğurla icra etmişdir. O, Azərbaycanda sahibkarlıq fəaliyyəti haqqında ilk elmi işin — "Azərbaycanda sahibkarlıq fəaliyyətinin təşəkkülü və qanunauyğunluqları" mövzusunun müəllifi kimi ölkə iqtisadiyyatında mühüm iz qoymuş ilk alim xanımdır. 200-ə yaxın elmi məqalənin, tezisin, dərslik və elmi tədqiqat işlərinin müəllifi olan dosent Sədaqət Əbdürrəhmanova uzun illərdir ki, Azərbaycan Texniki Universitetində gənc nəslin yetişməsinə böyük əmək sərf edir.
Ailəlidir, İki övladı və nəvələri var.

Görkəmli alimin doğum günü münasibətilə Yeniproqnoz.az saytının rəhbəri Xanım Bağırlı öz yaxın dostu və rəfiqəsi Sədaqət müəlliməyə özəl təbrik ünvanlayıb.
Xanım Bağırlı təbrikində Sədaqət müəllimənin zəngin elmi irsi ilə yanaşı, onun insani keyfiyyətlərinə və nümunəvi xanım obrazına diqqət çəkib:
"Yeni yaşınız mübarək olsun, əziz Sədaqət müəllimə! Gözəl xanım, qayğıkeş ana, xoşbəxt nənə, adı kimi sədaqətli həyat yoldaşı, səmimi və etibarlı rəfiqə — sizin cəmiyyətdəki və həyatımızdakı statusunuz saymaqla bitməz. Siz Azərbaycan Texniki Universitetinə illərini verən həqiqi bir fədaisiniz. Bizim dostluğumuz 5 il əvvəl Naxçıvana səfərimiz zamanı gözəl bir təsadüflə başladı və illər keçdikcə daha da möhkəmləndi. Rəbbim hər ikimizə sağlam, bərəkətli ömür versin, bu dostluq illərinin sayı daha da artsın! Sizi çox sevirəm!"
Xanım Bağırlı Sədaqət müəlliməyə möhkəm cansağlığı, uzun ömür, ailə səadəti və pedaqoji fəaliyyətində yeni-yeni uca zirvələr arzulayıb.
Biz də öz növbəmizdə hörmətli Sədaqət Əbdürrəhmanovanı doğum günü münasibətilə təbrik edir, ona elmi və pedaqoji fəaliyyətində bol uğurlar arzulayırıq!