İstedadlıları Tanıyaq və Tanıdaq İctimai Birliyinin təşkilatçılığı ilə həyata keçirilən "Mənim Uğur Hekayəm" rubrikasının növbəti buraxılışı baş tutub. Layihənin bu dəfəki qonağı döyüş növləri üzrə böyük nailiyyətlərə imza atmış gənc idmançı Zeynəb İbrahimova olub. Kyokushinkai karate və Alpagut Turan döyüş sənəti ilə peşəkar şəkildə məşğul olan Zeynəb İbrahimova indiyədək qazandığı titullarla ölkəmizi layiqincə təmsil edib. O, fəaliyyəti dövründə 1 qat Dünya çempionu, 6 qat Respublika çempionu və 2 qat Bakı çempionu adlarına layiq görülüb. Müsahibə zamanı idmançı öz uğur yolundan, gərgin məşq proseslərindən və əldə etdiyi beynəlxalq zəfərlərdən ətraflı bəhs edib, idmana marağı olan gənclərə öz dəyərli tövsiyələrini verib. Tədbirin sonunda layihə rəhbəri Vüsalə Qələndərli tərəfindən idman sahəsində qazandığı yüksək nailiyyətlərə və gənclərə nümunəvi fəaliyyətinə görə Zeynəb İbrahimovaya "Uğur 2026" fəxri diplomu təqdim olunub.